1. هاممی یاتیپ، من آییغام.
رادیو مایاکدا اولان آهنگلره قولاق آسیرام. آرام‌ام، بیراز دا دوشونجه‌لی، آزاجیق دا اؤزلم‌دن دوغموش غم بوغسو اورگیمین شوشه‌سینه قونموش.
2. شاعر دییر «هر کس پایینا دوشنی یاشار»
بو دا بیزیم پاییمیزا دوشدی
دوشونورم بو حایات‌دا چوخ شئی‌لریمیز یوخ، آما اولمایان ان اؤنملی شئی حضور و آرامش.
----
ی.س.: بولاری 1398/01/08 تاریخینده گئجه ساعات ایکی‌ده تلگرامدا یازدیم.
1. 1397 سون گونلرینه یئتیشمیش. بو سون گونلرده باشیم قالماقالدان آیریلیپ. بیلمیرم یئنی ایل تحویل اولمادان بیر داها یازابیله‌جگم یا یوخ. یازماغین پارامئترلری چوخدور و بولاری بیر یئرده آیارلاماق راحات ایش دییل. 1397 منیم ایچون ان محتشم و عئنی زاماندا ان فاجیعه ایللردن بیری اولدی! محتشملیگی بونا گؤره کی عؤمرومده باشلادیغیم ان زور و ان اؤنملی ایشلردن بیرین بیتیردیم بو ایل، چوخ دا گؤزل بیتیردیم. فاجیعه بونا گؤره کی بو ایلده بئش قات باتدیق دیبه! باتلاق* دیبینه. بو فاجیعه باعث اولدی نئچه شئیی بیر داها، بیر داها و بیر داها دوشونم. مثلا بیریسینی آچیق سئومگه** و حیات یولداشینا بیر داها دوشنمویم، هئچ اولماسا آزیندان بئش-آلتی ایله‌دک. یا مثلا بیر آیریسی مهاجرت مسئله‌سی‌دیر! ایندیه‌دک جیددی دوشونمه‌سم‌ده، داها باشلامیشام جیددی بو قونونی دوشونورم. البته‌ده باتلاقدان چیخیپ گئتمک ده چوخ زور ایش.
2. نوآم چامسکی‌نین آشاغیداکی جوابی بو اومید یوخسوللوغی دؤنمده آداما اومید و گودو (انگیزه) وئریر. چامسکی‌نین بو سؤزلری او قدر اؤنملی‌دیر کی هر یئنی بیر گونه باشلایاندا، بیر داها اوخوماق لازیم:
بیریسی دئدی: [آنارشیزم‌دن] عملیاتی بیر ایده‌آل بولماق چوخ چتین.
نوام چامسکی جوابیندا دئدی: دوزدور. آما اون سکیزینجی یوز ایلده ده ی دئموکراسی‌دن عملیاتی بیر ایده‌آل بولماق چوخ چتیندی. بو ایمکان‌سیزدیر دئمک دییل‌میش. آما اون دوقوزونجی یوز ایلده بؤیله بیر شئی واردی. «بؤیله بیر شئی اطرافیمیزدا یوخدور» دئمگین اؤنمی یوخ، اینسان اوغلونون تاریخی سونا ارمه‌دیکچه بو سؤزون اؤنمی یوخ. ایکی یوز ایل گئریه دؤنسک، کؤله‌لیگین آرادان قالدیریلماسی دا چتین گؤزوکوردی.
آنارشیزمه گؤره، نوآم چامسکی
----
* اقتصادی باخیم‌دان و یا مودئرن اوغرولوق!
** البته کی گیزلی و اوزاقدان سئومک اولار.
1. یازماق بیر دونیادیر. اوردا دوشونمک وار، دویقو وار، دوشونجه‌نی یازی ایله تثبیت ائتمک وار و نه‌لر نه‌لر. اوردان دیشاردا نه وار؟ اوردان دیشاردا بیر باشقا دونیا وار کی اورادا ایش وار گوج وار، گونده‌لیک ایشلر وار، اینسانلارلا ایلگیلنمک وار و نه‌لر نه‌لر. بیر داها دقیق یازسام: ایکی دونیا وار، بیری دیش دونیا بیری ایسه ایچ دونیا. بو ایکی دونیادا ایچ-ایچه و عینی زاماندا یاشاماق اولمور! اینسان دیشاردا دوغولور آما یازماق ایچون ایچری دونیایا گیرمه‌لی. بو دیش دونیادان ایچ دونیایا اولان یولدا او قدر انگل وار کی راحات راحات اورا گیرمک اولمور مع الاسف!
1. اینسان چوخ اونوتقان بیر موجوددور. باشینا نه‌لر گلیر هامیسین اونوتور! سانکی هئچ اؤیله بیر شئی اولمامیش کیمی. کندینی یئنیدن درده و بلایا دوشدوگو موقعیتده قویور. اونوتماق اولایینا هم بیر نقص کیمی باخماق اولار همده بیر موهبت کیمی. نقص بونا گؤره کی، بیز چتین‌لیکله اؤیرندیکلریمیزی اونوتوروق، زامان صرف ائدیپ اوخودوقلاریمیزی اونوتوروق، باشاردیقلاریمیزی اونوتوروق، اؤنملی تاریخیمیزی اونوتوروق. بودور کی دئییپ‌لر بیلیم‌ین آفتی اونوتماق‌دیر. و بولاری یئنیدن الده ائتمک ایچون چوخ بؤیوک هزینه‌لر وئرمه‌لییک. اولایین بو طرفی بو کی بیز چوخ آجی و دؤزونولمز اولایلاری و خاطیره‌لری ده اونوتوروق. سئودیگیمیز بیریسی ایله آیریلمانی اونوتوروق، آجی اولایلاری اونوتوروق، سئودیگیمیز اینسان‌لارین اؤلومون اونوتوروق. و بودور کی دییرم یاشاماق چاره‌سی اونوتماق‌دیر.
2. بیر دردلی آیریلیقدان سونرا، بیر آجی اؤلومدن سونرا و یا اوزوجو اولایدان سونرا، اینسان‌لارین چوخو زامانی بیر درمان کیمی گؤرور. زامان گئچدیکجه آجیلار و اوزونتولر آزالماغا باشلار. ایندی زامان می آجیلار و اوزونتولری آرادان قالدیریر یوخسا اونوتماق می؟ آجی خاطیره‌لرین اوستونه زامان توزو قوندوقجا، اوزونتولر آزالار. زامان توزو قونماق، آجی خاطیره‌لرین آیرینتیلاری (جزئیات) آرادان گئتمک دئمکمیش و بو بئینین آجی خاطیره‌لرین اوزوجو آیرینتیلارینا داها آز اولاشابیلمک دئمکمیش. دئمک زامان توز اولور و خاطیره‌لر اوستونه قونور و آیرینتیلار ایتیر و سونوجدا یاشاماق راحاتلاشیر.
3. و بؤیله اولور اینسان گئچمیشده اؤز یازدیغی آجی دویقولارین توصیفین همن تانیمیر! جومله‌نی اوخویاندان سونرا، بئینین گیزلی بوجاقلارین آرامالی و بیر نئچه لحظه زامان وئرمه‌لی.
1. اطلاعیه ادامه فعالیت بیتمیش رادیو:
طبق برنامه‌ریزی قبلی مقرر بود تا فصل جدید بیتمیش رادیو از اسفند ماه پس از استراحت یک ماهه مجدداً آغاز به کار کند، لیکن با توجه به مشکلات شخصی پیش‌آمده برای کارشناس عزیز برنامه آقای سئور شهابی، بیتمیش رادیو افتخار ادامه همکاری با ایشان را نخواهد داشت.
ضمن معذرت‌خواهی از شما عزیزان، جهت ادامه فعالیت‌های بتیمیش رادیو از ادیبان علاقه‌مند به موضوع جهت همکاری دعوت به عمل می‌آید. (از ایده‌های جدید در این زمینه نیز استقبال می‌کنیم.)
ادیبان و افراد حاذقی که مایل به همکاری در زمینه تولید محتوای فاخر ترکی هستند لطفا به آی‌دی @hibitmish پیغام دهند.
درصورتی که فردی مناسب و در خور مخاطبان عزیز یافت شود بیتمیش رادیو به فعالیت خود ادامه خواهد داد.
بیتمیش رادیو قدردان زحمات آن ادیب گرامی، که گنجینه‌ای پرگهر در ساحه ادبیات ترکی شهر عزیزمان میباشد بوده و ضمن آرزوی شادی و سلامتی برای ایشان، از ادامه نیافتن همکاری با ایشان در خلق این کار ارزشمند متاسف میباشد.
#بیتمیش_رادیو
@BitmishRadio
2. حدودا ایکی آی اؤنجه آخشام اوستو یورقون ایشدن چیخمیشدیق و یولداشلارین بیریسی ایله قاییدیردیق. خط واحده یئتیشمگه، اون بئش دقیقه‌لیک پیاده یولوموز وار ایدی. آخشام قارانلیغیندا دانیشا-دانیشا گئدیردیک. بیلمیرم سؤز هاردان دوشدو کی «پادکست»لردن سؤز آچیلدی:
او: بیتمیش رادیویا قولاق آسمیسان؟
من: هن! اوول بؤلومونه قولاق آسمیشام. او قارا چادیر، قیرمیزی چادیر و آغ چادیردان دانیشیردی.
-هن هن. هممم. آدی دیلیمین اوجوندا. دیرسه‌خان داستانی! اوندان سونرا بئش دانا دا گلیپ! اول سئزون بیتیپ. ایکینجی سئزون باشلایاجاق!
-هن، جالیبدی.
-چوخ قشنگدی. قولاق آس. فایللارین تئلئقرام‌دا یوللارام قولاق آسارسان.
-یوللا
-تورکجه پادکست تازا چیخیر، فارسی پادکست چوخ چوخدور. اولار چوخداندیر ایشلییرلر و حرفه‌ای‌دیلر.
-تورکجه پادکست سینیق رادیودان باشلادی.
-بیلمیرم ائشیتمه‌میشم.
-فارسلار حرفهای ایشلیرلر، اولارین مالی حامی‌لاری دا اولور. لاپ مشهورلار Bchannelدیر. علی بندری آدیندا بیریسی. تورکجه‌ده ایسته‌سه‌لر گوجلو اولسون، حرفهای ایشله‌مه‌لیدیرلر. مثلا مالی حامی بولمالیدیلار. ایشلری فقط پادکست دوزلتمه اولمالیدیر. پادکست ایشله‌مک چوخ چوخ وقت آلار. بوجور ائله‌مه‌سه‌لر موفق اولمیاجاقلار.
-هن دوزدور، آما فارسجا و تورکجه پادکستین بیر بؤیوک فرقی وار.
-نمنه؟
-اولارین ایشله‌ماغا مشکل‌لری یوخدور. راحات راحات ایشلیرلر آما تورکجه‌ده او راحاتلیق یوخدور. امنیتی قوه‌لر بیلسه‌لر ایجازه وئرمزلر. فوراً باغلادارلار.
-یوخ بابا، پادکست‌ده بیر حساس سؤز دئمیرلر کی!
-بلی، دوزدور. بیر سؤز دئمیرلر. آما بیر بتر و بؤیوک ایش گؤرورلر: تابولاری سیندیرماق! امنیتی قوه‌لر ایسته‌میر تابولار سینا. تابولار سینسا، یانی اونلارین یوز ایل برنامه تؤکوپ یاپدیقلاری ت‌لری و کلان پوللاری بیر پادکست داغیتدی! قوی بوجور دییم: فرض ائله بیتمیش رادیو گئتدی شرکت‌لرین بیریسی ایله دانیشدی و اولارین حامیسی اولدی. ایکی گون سونرا بیلینمز یئردن زنگ ووراجاقلار شیرکته کی بیر داها بو غلطلردن(!) ائله‌سن آچماز ائلیه‌جاغیق بیله‌زی.!
-یوخ بابا فیکر ائله‌میرم!
.
3. اوندا من فرض ائله‌میشدیم کی تهدید اولونابیله‌جک موثر نقطه فقط شیرکت‌دیر! بوگون بیتمیش رادیونون یوخاریداکی پستون گؤردوم و ایستر ایسته‌مز او گون یادیما دوشدو! کئشگه گرچک‌دن سئور شهابی بگ‌ین شخصی مسائلی پادکست‌ده ادامه وئرمه‌سینه مانع اولموش اولا. انشالله.
1. الیف شفقین عئشق آدلی کیتابین ایکی گون اؤنجه کیتابخانادان امانت آلدیم. قالین روماندیر. کیتابی آلاندا کیتابخانا مسئولونون سؤزی یادیمدا: «ایکی هفته وقتیز وار» و من اؤز-اؤزومه: «بو قدر مشغله‌نن بو کیتابی ایکی هفته‌ده بیتیره بیله‌جم؟!»، مسئول آرتیردی: «ایکی هفته‌ده تمدید ائلیه‌بیلرسینیز».
2. کیتابی آخشام یئریمه گیرندن سونرا الیمه آلدیم، اوول ایکی اوچ پاراگرافی بیرآز آغیر اوخودوم، آما دؤرت-بئشینجی پاراگرافدان باشلایاراق بیردن بیره بووووم! کیتاب آدامی ائله اؤزونه توتوقلو ساخلیر کی، یئره قویماسی چوخ چتین مسئله اولور. آدام دییر بیر-نفسه اوخویوم بیتسین!
3. هئچ کیتاب بوراجان بو قدر تئز اؤزونه توتمامیشدی! ائله کیتاب واریدی کی کیتابین یاریسیناجان گؤنولسوز و روحسوز گئدیردی! آما بونا تای تئز توتان کیتابلاردان بیریسیدی ده یادیما گلیر ائدقار آلئن پونون «آرتور گوردون پیمین گئچمیش اؤیو» اولموشدی ایللر اؤنجه. آما او دا بو اندازه می تئز رئآکسیون وئرمیشدی می؟! یادیما گلمیر.
----
* گؤرونتو: اؤزومدن
1. «اونون سؤز و جومله دوزلتمکده عجاییب یئتهنگی واریدی. ظاهری مسئله‌لری اؤنمسه‌مه‌دیگینه گؤره بئینی همیشه آزاد ایدی، بونا گؤره یوخسوللوق اونو آیاقدان سالمازدی. ایمکانی واریدی کی لازیمی قدر و یاخجی پالتاری اولمایا، سویوقدان تیترهسین و یا آجلیغین اؤلدوروجو عذابینا گیریفتار اولسون، آما یئتر کی یوخلاسین، دوشونسون و گؤیده‌کی شهاب داشلارینا* باخسین، بئینی و دوشونجه‌سی آزاد اولاردی.»
پاریس و لندن‌ده پولسوز و در-به-در - جورج اوروئل
ترجمه: اؤزوم (فارسجادان)
2. هرکس دوروموندان آسیلی اولمایاراق، یاشاماقدا بیر فلسفه‌یه احتیاجی وار. ایش دردی، پول دردی، آجلیق، سئوگی، اوشاق، خانواده و.س. دردلر اینسانی چوخ راحات فلسفه‌سیز یاشاماغا گیریفتار ائلیه‌بیلر. فلسفه‌سیز یاشامادین می، بیر قیسیر دؤنگویه دوشموش اولورسان و هر شئی سیرادانلاشیر. بلکه**!
----
* شهاب سنگ
** بو دونیادا هئچ بیر شئی موطلق دگیل
«عرب‌لر آفریقانین باتیسیندا، ایکینجی دونیا ساواشیندان اؤنجه‌سینده هیدیستانلیلار و پاکیستانلیلار آفریقانین دوغوسوندا و یهودی‌لر اورپانین دوغوسوندا، بیر کلاسیک "دللال آزینلیق" اولوشتورموشدولار»
#یئر_کوره‌سینین_سونلاری
«آفریقانین حاشیهسینده اولان اؤلکه‌لرین نسبی عاجیزلیگی، آئیر آفریق اوچوشویلا فیل دیشی ساحیلینه (ساحل عاج) طرف قالخمامیشدان، نیویور کئنئدی هاوا لیمانیندا اؤزون گؤستردی. ائیر آفریق چیخیش قاپیسینین کناریندا، سئول و توکیو اوچوشلاری واردی. بو اوچوشلار اعلام اولاندا، بوتون ارکک و قادین تاجیرلر و بازرگان‌لار باهالی پالتارلار، دیزاوستو بیلگیسایارلار و گؤن کیف‌لر ایله اوچاغا ساری گئتدیلر. من و بیر عدده آفریقالی کی اوجوز چمدان‌لاری ایپ ایله بیر بیرینه باغلامیشدیلار، اللرینده صلیب اولان مذهبی مبلغ‌لر و راحاتی کؤینک ایله بوز پالتار گیین خیریه امدادچی‌لاری قالدیق. بو لحظه‌ده آفریقا، گلیشمیش دونیانین صنعت‌دن اؤته اؤلکه‌لریندن هر زامانکیندان داها دا اوزاق گؤزوکوردی.»
#یئر_کوره‌سینین_سونلاری
#یئر_کوره‌سینین_سونلاری
1997
روبئرت د. کاپلان
روبئرت د. کاپلان اطلس ژورنالینین باش ائدیتوری و *بالکانین ارواحی: تاریخ درینلیک‌لرینه بیر مسافرت* کیتابین یازاری‌دیر. او «یئر کوره‌سینین سونلاری»ندا فقط بیر سیرت چانتاسی (کوله پشتی) و بیر دفتر ایله آفریقا باتیسینین ویران اولموش اؤلکه‌لریندن باشلاییپ و دولانا دولانا مصر، ایران، اورتا آسیا، هند، پاکیستان و نهایت آسیانین گونئی دوغوسونا گئدیپ. بو اؤلکه‌لرده ملت-دولت بیرلشمه‌سی یوخدور هله، انسانلار هله تام ساکین‌لشمه‌میش و بو ایکی عامیل آنارشیزمین یارانماسینا باعث اولور.
او بو مسافرت‌ده گئچدیگی منطقه‌لرین فرهنگی اختلافلارینا بیر ناظر کیمی باخیر و بو اختلافلارین کؤی آچیقلاماغا چالیشیر (البته کی بیلدیگی پارامترلر ایله). کیتاپ حدوداد 20 ایل قاباغین کیتابی اولماسینا رغما اوخوماسیندا گینه فایدا وار. چالیشاجاغام بو کیتابی اوخودوقجا دگرلی نکته‌لرین #یئر_کوره‌سینین_سونلاری
هشتگ ایله بوردا یازام. بلکه ذهنیمده یاخجی تثبیت اولسون و بو واسیطه ایله سیز ایله ده بیر شئی پایلاشمیش اولوم.
1. اسماعیل بخشی ایشچیلره اولان ظلم علیهینه چوخلی اعتراض ائدندن سونرا نهایت امگین آلدی: 74 شاللاق و 14 ایل توتساق! قیسا و چارپیجی بیر ویدیودا بوغازی دویوملی دویوملی* دئدی: «لعنت به این زندگی!»
2. سحر خدایاری فوتبول ایستادیومونا گیرمک ایسته‌دیگی ایچون نهایت امگین آلدی: 6 آی زیندان! قیسا و چارپیجی بیر ائیلمده بنزینی اوستونه تؤکدو و اؤزون یاندیردی. بو ائیلمی یاپارکن سانیرام او دا دییرمیش «لعنت به این زندگی!»
----
* بغض
* یازماسایدیم اینسانیته خیانت ساییلاردی!
گئنه یوخودا سنی گؤردوم. کلاس دایدیق. مندن ایکی ردیف دالیدا اوتورموشدون. بؤرون اوسته اوزانمیشدین، حالین یاخجی دگیلدی، ناراحتیدین. بیلمه‌دیم نیه! دوردوم داها یاتانمادیم. نئچه ساعات سورا اذان اولدی. دوردوم گئتدیم مسجیده نامازا. ایکی رکعت ده حاجت نامازی قیلدیم. دعالار ائله دیم.
----
دؤرد بئش گون اونجه
1. اوزون آرادان سونرا بیر غزل*. ایلک، بو غزلین تک بیتین بولدوم: «تو خوب مطلقی، من خوب‌ها را با تو می‌سنجم .». سونرا شعرین بوتونون بولدوم. تک بیتین بولماغی دا اوزون ماجراسی وار! خلاصه بو کی، بیر یئنی محیط، بیر یئنی یاشاییش طرزی. الیم دونیادان و تکنولوژی‌دن کسیک! اولان تک شئی بیر کیتاپخانا و او کیتاپخانادا سئویلن تک بیر کیتاپ و نهایت «تو خوب مطلقی، من خوب‌ها را با تو می‌سنجم .».
2. «.
تو خوب مطلقی، من خوب‌ها را با تو می‌سنجم
بدین سان بعد از این خوبی، عیاری تازه خواهد یافت
.»
حسین منزوی
----
* غزلین بوتونون یازمادیم.
1. باشیم چوخ شلوغ اولور، دا چوخدانیدی سؤزبازی اؤتورموشدوم. گئچن هفته راست‌گله سؤزبازی چک ائله دیم و بو صحنه ایله مواجه اولدوم:
اوولده شوک اولدم! بیرآز او ال بو ال، ایمئیل میمیئلی چک ائلیندن سونرا گؤردوم کی «بلی»، هاست سؤزبازی سیلیپ! هن، بو راحاتیغا، هاست سؤزبازی سیلیپ! تصویرده اولان جمله اشتباه جمله‌دیر کی دییر «سایتین یییه‌سی، سایتی سیلمیش!» سایتین یییه‌سی سایتی سیلمه‌میش ده هاست اونی سیلمیش! آما نیه سیلمیش؟! چون سایت ریپورت اولموش! کیم طرفیندن ریپورت اولموش؟! اؤزگه طرفیندن دگیل، هاستین اؤزونون بیر بؤلومو وار کی ترافیک و منابعی کنترل ائلیر، کنترل بخشی باخیر گؤرور کی سؤزباز منابعی نسبتا بیرآز چوخ ایشلدیر، پس ریپورت ائدیر و نهایت سایتی سیلیرلر، منده 2-3 هفته سونرا بو اولایدان خبریم اولدی.
2. بوردان بوتون سؤزبازی ایشلدنلردن عؤذور دیلیرم!
3. داها حوصلم یوخ، بلکه بیر داها یولا سالانمادیم.
1. Hadise او سس تورکیه ده دئدی کی «من غوربتده یاشامایی ان اییی بیلیرم . غوربتده اوخولدا منه "پیس تورک" دیین اولدو . اوخولدا آلمانجا قونوشوردوق، ائوه دؤننده تورکجه قونوشوردوق. آلمانجادا اولان بیر ایکی خاص حرفی دوزگون تلفظ ائده‌بیلمیردیم، او اوزدن لاغا قویولاردیم .»
2. تانیش بیر حیکایه دگیل می؟ هر نقطه‌سی تانیشدیر. فقط فرقی بوردادیر کی Hadise اؤز مملکتیندن چیخیپ، بیر نئچه مملکتی گئچندن سونرا بیر باشقا مملکتده اوخولا گئدیپ کی او سؤزلری ائشیدیپ آما بورداکی اؤز مملکتی ایچینده بو سؤزلری ائشیدیر! جالیب دگیل می؟!
1. دونن‌دن باشلامیشام «چؤملمیش قافلان، گیزلی اژدها» فیلمینه باخیرام. چینین بو سبک فیلم‌لرین سئوه‌رم. اسکی‌لردن قالمیش، بیر گیزملی و گوجلو کلاسیک سیلاح، مثلا بیر اسکی قیلینج؛ همده توخ یاشیل رنگده یازیلاری/نقشلری اولان قیلینج. قیلینجین آدی دا وار اوسته‌لیک، سانکی جانلیدیر: یئشیل تقدیر. قیلینجین گوجو بیلینمز یئردن قایناقلانیر. بلکه بیر سئودالی دمیرچی دوزلتمیش. بیزیمکیلر سئودالاناندا داغ دلرمیشلر، چؤللره دوشرمیشلر، چینده ده قیلینج دوزلدرمیشلر! قیلینجین ایکی اوزو وار. بیرینجی اوزو گؤزللیک و گیزمله سوسلنمیش دورومو نورمال زاماندا. ایکینجی اوزو اینسان جانینی آلمیش دورومدان سونرا؛ قیپ قیرمیزی قان قیلیجدن آخارکن! همده قیلینجی وئر بیر ماهیر اوستا الینه. یئر گؤیو سارسیتیر!
2. فیلمی هله بیتیرمه‌میشم. فیلمین بیر یئرینده کاراکتئرلرین بیری اوخوماغا باشلیر! نه دیلده اوخوسا یاخجیدیر؟ من ائشیدنده چوخ شاشیردیر. تورکجه اوخویور! اوخویاندا ایلک و سون دیزه‌لری بیلمیرم نه دییر آما آرادا دییر «. گؤردوم شو گؤزل قیز هاوار گولی (؟) . ائی گؤزل قیز، هاوالی قیز».
3. بو تورکجه اوخویان کاراکتئر فیلمین بیر یئرینده سئودیگی قیزین باشقا آداملا تویونا گلیر، توی مراسیمی بیرآز قاریشدیراندان سورا قیزا دییر «گل گئدک شین‌جان ا» شینجانی ائینی قولاق ائشیتدیگی کیمی یازدیم. فیلمین آلتیازیسیندا یانیلماسام «جین کیانگ» یازیر. بیر زامانلار بیر چیندن جینس گتیرن بیریسی دییردی که چینین شین‌جان بؤلگه‌سی اویغورلارین یوردودی.
4. بدنیم چوخ ضعیفلییپ. ایچیم تیترییر. تاب و تواندن دوشموشم. بیلمیرم بو کومونیست چیندن گلن سوغاتدان توتموشام یا باشقا بیر شئی. بو وضعیتده اوسته‌لیک بیر چین فیلمینه ده باخیرام. هن؟ نئجه‌دیر؟!
----
چؤملمیش قافلان، گیزلی اژدها اوخوماق
درباره این سایت